ضرس العقل
قصة قصيرة من تأليف د. أشرف مهدي
واحد صاحبي وحبيبي راح لدكتور السنان لإن ضرس العقل عنده كان تعبان جدا ومش قادر يستحمله واللثة وارمه والخد منفخ وصداع جامد جدا في دماغة , وطبعا ده كمان أثر على الأذن الوسطى والجيوب الأنفية بقى الواد يا كبدي ماشي يتطوح مش عارف يلاقيها منين ولا منين , الراجل الدكتور ده من زمان بيعالج عيلة صاحبي وبصراحة ماكنش بيقصر مع حد فيهم , يعني مرة عمل عملية لجد صاحبي كانت سنانه شبه خربانة أو بالأصح أيامها كان التوصيف بتاع الحالة كده وماكنش قدام الدكتور غير إنه يعمل عملية بسرعة ويفتح اللثة ويدخل على عضم الفك ويشيل الكام ضرس الخربانين بجدورهم , هو صحيح الراجل جد صاحبي الله يرحمه عاش بتاع تمنتاشر سنة وشه مشوه بس الحال كان ماشي , وطبعاً ماكنش بيعرف ياكل كويس من الوضع الجديد للفك وبصراحة الراجل كان صرف كتير قوي علشان يرمم الفك لكن كان كل لما يعمل حاجة ما تكملش لأخرها وفضل وشه معووج لغاية لما مات, بس الراجل جد صاحبي ده كان جدع .. من ساعة لما عمل العملية ماقلش آآي واحدة ولا إتألم لكن لما كبر بقى ماستحملش بقى يزعق ويهلل ويلم الناس حواليه , الصراحة الناس كانت بتحبه ومهماً شخط في حد فيهم ولا شتمه برضة كان بيستحمله , أصل الراجل ده كان له هيبه وكلمة في المنطقة بتاعتهم , من ساعة لما بنى الورشة بتاعته وشغل فيها ناس كتير من شباب الحتة , ياللا الله يرحمه كانت أيام .. والغريب إن أبو صاحبي راخر كان عنده مشاكل في سنانه بس ده بقى كانت مشكلته في أنيابه , أصله بصراحة كان غاوي أكل لحمة وطبعاً كلنا عارفين إن الأنياب بتشتغل جامد مع أكل اللحمة والظاهر إن هو ده اللي خلاها تخرب بدري , كان في عزه يمسك فخدة الخروف يفرتكها , الناس بعد ما جد صاحبي توفى ما كانوش فاكرين إن الراجل إبنه هيعرف يشغل الورشة ولا لأ , لكن بصراحة الراجل عمل اللي عليه وشغلها , بس مش هي دي المشكلة , اللي حصل إن أبو صاحبي الله يرحمه هو كمان ... مات وهو بياكل في يوم من الأيام .. نتشله هبرة لحمة بالقواطع وحاول كتير قوي يمضغها لكن انيابه كلها كانت وقعت , ووقفت الهبرة في زوره بالعرض لغاية مالسر الإلهي طلع , والله العيلة دي اتبهدلت وأهو جه اليوم على صاحبي اللي ضرسه خلاص مش نافع , خرب على الآخر والمصيبة أنه مُصر ياكل عليه , ناس كتير نصحوه إنه يبطل أكل على الضرس الخربان ده بس ما فيش فايدة , ونصحوه أنه يروح للدكتور بتاع العيلة , بس الدكتور كبر وركبه بقت ملخلخين وإيده بتترعش , الراجل الدكتور أول ما شاف صاحبي قاله إزيك يا واد والله طالع لجدك , الظاهر أنه كان بيعاني من نفس المشكلة .. طب والعمل هيكسرله فكه زي ما عمل مع جده ويعيش بقيت عمره مشوه زيه ولا هيسيبه بيتألم , والخوف لحسن الضرس يصيب بقيت الضروس اللي جنبه ويفضل الواد يا ولداه من ضرس خربان لضرس مسوس لضرس مكسر ومهري , دكتور العيلة كبر ورجل برة ورجل مش باين مكانها فين بالظبط .. وبصراحة ما بقاش في الفورمة وبقاله زمان معتمد على إن سنان صاحبي لسه بصحتها وجامدة ومتبتة ومستقرة وبتطحن , بس الحقيقة مش كده الواد ضرسه اتهرى ما بقاش نافع والمصيبة إن جدره طويل وملوي , لما الدكتور فكر قال آخد وقتي علشان ما يجرالوش زي جده وابتدى معاه العلاج من الأول , كتبله مضاد حيوي علشان الورم يفش وقاله تعالى بعد كام يوم ، صاحبي كان تعبان جداً فاستسمح الدكتور إنه يشوفله سرير في المستشفى الخاص بتاعته وأهو منها يريح وبرضه الممرضات تتابعه وتراعيه بدل ما يروح ويتعب في البيت , الدكتور كان رافض الفكرة وقاله لازم تروح تستريح مش هاينفع تبات في المستشفى , صاحبي قال للدكتور أنا مش هاتنقل من هنا إلا لما تعالجني وبصراحة أنا غلبت مالضرس ده وما فيش حل غير الخلع , بس الدكتور قعد يفهمه ويقوله إن ما ينفعش يتخلع قبل الورم ما يفش , وصاحبي قفلت معاه وقفش في الحدوتة وقالك وجع ساعة ولا كل ساعة .. أخلعه دلوقت قبل ما يضرب الطقم كله , وبرضه الدكتور مش عاوز يخلص الموضوع , من ناحية إيده ما بقتش بنفس قوة زمان ومن ناحية تانية افتكر شكل جده بعد العملية , وبعد كلام كتير بين صاحبي وبين دكتوره .. الدكتور قرر يتحرك شوية ويساعده من وجهة نظره .. مسك المشرط وفتحله فتحة في اللثة علشان يفضي شوية من الورم وفعلاً طلع اللي طلع منها لكن لسه اللي جوه كتير واللثة معبيه , صاحبي صرخ من الألم , وعيط , عيط كتير , كتير قوي والدكتور يقوله مالك مالك مالك والواد ما بيردش كل اللي قادر يعمله أنه يصوت ويصرخ ويمسك خده المنمل من كتر الألم والوجع والضرس راشق في اللثة , الناس اللي في المستشفى اتلموا في أودة الكشف وكل واحد بكلمة ورأي ، اللي يقوله يا دكتور في حد يعمل كده , واللي يقول الجرح ده ممكن يتلوث ، واللي دخلت تصوت وتشتم في الدكتور ، واللي قال لصاحبي ما تصبر يابني مستعجل ليه مش الدكتور كتبلك على مضاد حيوي ، واللي يقول الضرس ده لازم يتخلع حالاً ... كلام كلام كلام والواد بيصرخ مالألم ... وبعد فترة مش قصيرة صاحبي همد وداخ ونام على سرير الكشف , الدكتور حاول يصحيه ما فيش فايدة ، الناس حاولوا برضه بس الواد ماسألش فيهم ، الألم اللي شافه خلاه مدروخ وحلف إنه مش متعتع من هنا قبل مالضرس ده يتخلع ، يهديك يرضيك يا بني روح وتعالى هنخلعه بعد كام يوم ، ما فيش فايدة , مش هاينفع تبات في أودة الكشف .. طب هنشوفلك سرير في المستشفى ، وهو خلاص مش ناوي يتحرك ، من هنا لهنا الدكتور سابه نايم وروح , وبعد كام يوم الواد لسه في أودة الكشف والدكتور بييجي كل يوم يكشف على المرضى بتوعه ويشوف شغله ويروح ولسه الضرس في مكانه ، هو بصراحة الورم فش شوية بس مش خالص ، والأكادة إن الوجع لسه موجود ، الناس في المستشفى فضلوا قاعدين جنب الواد يومين صعبان عليهم اللي هو فيه ، وكتير منهم تخيل لو كان مكانه هيعمل إيه ؟ .. بس شوية والناس زهقت وابتدوا يتفرقوا وكل واحد راح يشوف شغله ونسيوا الضرس اللي سوس ومبوظ دماغ الواد ...
الدكتور بقى يستغل الوقت اللي بينام فيه الواد وابتدى يديله حقن مهدئة علشان الوجع يقل شوية .. صعبان عليه حال الولد .. ويوم ورا يوم الألم قل كتير , والواد شاور عقله وسمع كلام الكبار وقرر إنه يروح ويتعالج لغاية ما يخف والورم يفش ويرجع يخلع الضرس العنيد , روح الواد ونام وصبر الكام يوم اللي باقيين ، والوجع ابتدى يقل والورم كمان , وفي يوم صحي الواد لقى الوضع بقى تمام وجه معاد الخلع , لبس اللي على الحبل واتشيك ورش برفان , ونزل الشارع وعند محل الخردوات وقف اشترى علبة قطيفة علشان يشيل فيها ضرسه بعد ما يتخلع ، ما هو برضه ما نسيلوش أيام حلوه كتير أكل فيها حلاوة المولد وجزر ودوم وحاجات كتير ماكنش ينفع معاها إلا الضرس ده , وبرضة العشرة ما تهونش إلا على ولاد الحرام , وقرر أنه يحتفظ بيه للأبد ويحافظ عليه في علبته , ولما وصل للدكتور قابله بابتسامة وقعده على الكرسي وبنجه , بصراحة صاحبي قلق أول ماحس بالبنج بيسري في بقه شوية وماحسش بفكه خالص وحبة وماحسش ببقه كله ، صاحبي غمض عينيه وحاول يغلب الشك اللي في قلبه ويصبر لآخر مرة علشان يعيش بعد كده حياة أفضل بدون ألم ولا خوف ، وبدأ الدكتور العملية وبصراحة كانت إيده خفيفة جداً ، حاول على قد ما يقدر إن صاحبي ما يحسش بأي ألم ، وبعد ما خلص طهر الجرح وحط عليه قطنه وقال لصاحبي ما ياكلش حاجة النهاردة وممكن يشرب عصير ومن بكرة ياكل براحته , صاحبي أول ما فاق سأل على الضرس .. إتخلع ؟؟.. شاور الدكتور العجوز براسه وابتسم ابتسامة خبى وراها شفقة على صاحبي بعد اللي جراله ... روح صاحبي وهو طاير من الفرح وفي إيده ضرسه محطوط في العلبة , قعد يغني طول الليل لغاية ما نام , والصبح أول حاجة عملها بعد ما صلى وشكر ربنا على الصحة والعافية راح ناحية المطبخ وعمل أحلى وأجمل ساندوتش وقطم قطمة .. ومع أول قطمة صرخ .. منين جي الألم مش فاهم ، رمى كل اللي في بقه وجري على الحمام , ملى بقه ميه و غسله كويس جداً , وقرب ناحية المراية وفتح بقه على الآخر , وبص , اتملت في عينيه الدموع وصرخة انحاشت في زوره , مسح دموعه علشان يشوف كويس , وبص تاني .. لقى مكان الضرس القديم الكبير فراغ كبير وفي وسطه ضرس صغير شبه الضرس القديم بالظبط لكن بيلق في مطرحة وبواقي أكل من اليمين والشمال اتجمعت حواليه وكأنه سلة مهملات لما اتملت الناس بقت بترمي جنبها أكياس كتير لدرجة انها ما بقتش باينة في وسطها .. صرخ الولد وفتح البيبان وشارع ورا شارع وهو بيجري خايف من مصير مجهول لغاية ما وصل لعيادة الدكتور يقوله ازاي عمل كده وهو اللي وثق فيه وصدقه .. لكنه لما وصل لقى على باب عيادة العجوز (توفى إلى رحمة الله الدكتور العجوز).
0 التعليقات:
إرسال تعليق